Surah Al Haqqah Ayat 35 Translation Tafseer

Para 29 - تَبٰرَكَ الَّذِیْ

سورة الحاقة

Audio PDF

بِسْمِ اللّٰهِ الرَّحْمٰنِ الرَّحِیْمِ

69.35-37

فَلَیْسَ لَهُ الْیَوْمَ هٰهُنَا حَمِیْمٌۙ (35) وَّ لَا طَعَامٌ اِلَّا مِنْ غِسْلِیْنٍۙ (36) لَّا یَاْكُلُهٗۤ اِلَّا الْخَاطِـــٴُـوْنَ۠ (37)

Kanz ul Iman Kanz ul Irfan

کنزالایمان

تو آج یہاں اس کا کوئی دوست نہیں ۔ اور نہ کچھ کھانے کو مگر دوزخیوں کا پیپ ۔ اسے نہ کھائیں گے مگر خطاکار ۔

تفسیر : ‎صراط الجنان

{فَلَیْسَ لَهُ الْیَوْمَ هٰهُنَا حَمِیْمٌ: تو آج یہاں اس کا کوئی دوست نہیں ۔} اس آیت اور اس کے بعد والی دو آیات کا خلاصہ یہ ہے کہ قیامت کے دن پکڑنے اور طوق ڈالے جانے کی جگہ پر کافر کا کوئی دوست نہیں جو اسے کچھ نفع پہنچائے یا اس کی شفاعت کرے اور نہ (اس کے لئے) دوزخیوں کے پیپ کے سوا کچھ کھانے کو ہے اور اس پیپ کو کفار ہی کھائیں گے جو کہ خطاکار ہیں ۔( روح البیان، الحاقۃ، تحت الآیۃ: ۳۵-۳۷، ۱۰ / ۱۴۷-۱۴۸، خازن، الحاقۃ، تحت الآیۃ: ۳۵-۳۷، ۴ / ۳۰۶، ملتقطاً)

جہنمیوں کی پیپ کی کیفیت:

قیامت کے دن کفار کا کوئی دوست نہ ہونے کے بارے میں ایک اور مقام پر اللّٰہ تعالیٰ ارشاد فرماتا ہے:

’’مَا لِلظّٰلِمِیْنَ مِنْ حَمِیْمٍ وَّ لَا شَفِیْعٍ یُّطَاعُ‘‘(مؤمن:۱۸)

ترجمۂ کنزُالعِرفان: ظالموں کا نہ کوئی دوست ہوگا اورنہ کوئی سفارشی جس کا کہا مانا جائے۔

اور جہنمیوں کی پیپ کے بارے میں حضرت ابو سعید خدری رَضِیَ اللّٰہُ تَعَالٰی عَنْہُ سے روایت ہے،حضورِ اقدس صَلَّی اللّٰہُ تَعَالٰی عَلَیْہِ وَاٰلِہٖ وَسَلَّمَ نے ارشاد فرمایا’’اگر جہنمیوں کی پیپ کا ایک ڈول دنیا میں انڈیل دیا جائے تو وہ (پوری) دنیا والوں کو بدبودار کر دے۔( مستدرک، کتاب التفسیر، تفسیر سورۃ الحاقۃ، ۳ / ۳۲۷، الحدیث: ۳۹۰۴)

Next Ayat Prev Ayat